ആഗ്രഹങ്ങളിലെ അണ്ടര്‍വേള്‍ഡ്

അധോലോകം എക്കാലത്തും എന്‍റെ ഒരു Weakness ആയിരുന്നു. ജീവിതത്തില്‍ എന്തെങ്കിലും ക്രൈസിസ് നേരിടുന്ന സാഹചര്യങ്ങളില്‍ ബോംബെയ്ക്ക് നാട് വിടണം ; അവിടെ ഒഴിവ് അനുസരിച്ച് ഏതെങ്കിലും അധോലോകത്ത് കയറിപ്പറ്റണം ; തുടര്‍ന്ന് കാറും ഓവര്‍കോട്ടും കൂളിംഗ് ഗ്ലാസും സമ്പാദിച്ച ശേഷം തിരികെ നാട്ടില്‍ വരണം എന്നുമായിരുന്നു പദ്ധതികള്‍. അധോലോകത്ത് അത്യാവശ്യം സ്വയം പര്യാപ്തത നേടിയ ശേഷം സ്വന്തമായി ഒരു അധോലോകം. അതിന് വേണ്ടിയുള്ള പദ്ധതികള്‍ സ്കൂള്‍ കാലം മുതല്‍ ഞങ്ങള്‍ ഒരു സംഘം പേര്‍ ആലോചിച്ചു വച്ചിരുന്നു. വളരെ ചെറിയ ഡീറ്റെയില്‍സ് ഉള്‍പ്പടെ പരിഗണിച്ചു കൊണ്ട്.


ആദ്യകാലത്ത് ലക്ഷണമൊത്ത ഒരു കൊള്ളസംഘം എന്ന നിലയിലാണ് ചര്‍ച്ച തുടങ്ങിയത്. പക്ഷെ അങ്ങനെ ഒരു കണ്‍ട്രിപ്പേരില്‍ അല്ല ഞങ്ങള്‍ അതിനെ വിളിക്കുകയും പരിഗണിക്കുകയും ചെയ്തിരുന്നത്. ഒരു ക്രൈം സിന്‍ഡിക്കേറ്റ് എന്നൊക്കെയുള്ള ഭംഗിയുള്ള പേരില്‍ വിളിക്കാവുന്ന ഒരു സെറ്റ് അപ്പ് ആയിരുന്നു അത്. പെറ്റിക്കൊള്ളകള്‍ മാത്രമായിരുന്നില്ല ഞങ്ങള്‍ ചെയ്യുക. മറിച്ച് ആവശ്യം വരുന്ന മുറയ്ക്ക് നല്ല മനോഹരങ്ങളായ കൊലപാതകങ്ങളും ഞങ്ങള്‍ ചെയ്യാന്‍ പരിപാടിയിട്ടിരുന്നു. ഉപദ്രവികളായ ആളുകളെ ഇല്ലാതാക്കി ഭൂമിയെ ജീവിക്കാന്‍ കൊള്ളാവുന്ന ഒരിടം ആക്കി മാറ്റുക.  പദ്ധതി തുടങ്ങിയ കാലത്ത് ഞങ്ങള്‍ പഠിച്ചിരുന്ന സ്ഥാപനത്തിലെ ഹെഡ് മാസ്റ്ററെയായിരുന്നു ഞങ്ങള്‍ തിരഞ്ഞെടുത്തിരുന്നത്. 

ചില കൂറ മലയാള സിനിമയില്‍ കാണുന്നത് പോലെ ചായപ്പെട്ടികള്‍ നിറയെ അടുക്കി വച്ച വലിയ ഒരു ഗോഡൌണായിരുന്നില്ല സിന്‍ഡിക്കേറ്റിന്‍റെ താവളം. മറിച്ച് . മറ്റേതൊരു സ്ഥാപനവും പോലെ നഗരഹൃദയത്തിലോ ഹൃദയത്തിന്‍റെ പരിസരത്തോ ആയി നല്ല ഉഗ്രനൊരു പത്ത്-പതിനഞ്ച് നില ഉയരമുള്ള ഒരു ബില്‍ഡിംഗിലായിരിക്കും സിന്‍ഡിക്കെറ്റ്‌ പ്രവര്‍ത്തിക്കുക. ഫ്രെണ്ടില്‍ മുഴുവന്‍ ഗ്ലാസിട്ട ഒരു കലക്കന്‍ കെട്ടിടം. കണ്ടാല്‍ എത്ര നിലയുണ്ട് എന്ന് മനസ്സിലാക്കാന്‍ അത് ഉണ്ടാക്കിയവന് പോലും പറ്റരുത്. "ഓഫീസ്" എന്നായിരിക്കും ഞങ്ങള്‍ സ്റ്റാഫ് താവളത്തെപ്പറ്റി പറയുമ്പോള്‍ പരാമര്‍ശിക്കുക. ഗ്ലാസിട്ട വിശാലമായ വാതില്‍ തെന്നി മാറിയാലുടന്‍ തലങ്ങും വിലങ്ങും ഗ്ലാസിട്ട ലിഫ്റ്റുകള്‍ മുകളിലേയ്ക്കും താഴേയ്ക്കും ഒഴുകിക്കൊണ്ടിരിക്കും. അതിനുള്ളില്‍ നിന്ന് മൊബൈലും പിടിച്ച് സംസാരിക്കാന്‍ വേണ്ടി മാത്രം സ്യൂട്ടും മറ്റും ചില കോന്തന്‍മാരെയും കോന്തികളെയും നമ്മള്‍ അപ്പോയിന്‍റ് ചെയ്തിരിക്കും. (ഒരു റിച്ച്നെസ്സിന് വേണ്ടി !!)




കൃത്യമായി ടാക്സ് അടയ്ക്കുന്ന തികച്ചും മാന്യമായി പ്രവര്‍ത്തിക്കുന്ന ഒരു ഓഫീസ് എന്ന നിലയ്ക്ക് ആയിരിക്കും നഗരത്തില്‍ ഞങ്ങള്‍ പ്രവര്‍ത്തിക്കുക. "യൂണിവേഴ്സല്‍ എക്സ്പോര്‍ട്സ്" എന്നൊക്കെപ്പറയുന്ന പോലെയുള്ള ഗമയുള്ള പേരായിരിക്കും ഓഫീസിന് ഉണ്ടായിരിക്കുക. കൃത്യം പത്ത് മണിക്ക് തന്നെ ഓഫീസ് ആരംഭിക്കും. നല്ല കലക്കന്‍ ലോ ഫ്ലോര്‍ ബസുകളില്‍ മിടുക്കന്‍മാരും മിടുക്കത്തികളുമായ ഞങ്ങളുടെ സ്റ്റാഫ് വന്നിറങ്ങും. റിസപ്ഷനില്‍ നന്നായി പുഞ്ചിരിക്കുന്ന, വാട്ട് ക്യാന്‍ ഐ ഡൂ ഫോര്‍ യൂ എന്ന് ഭംഗിയായി ചോദിക്കുന്ന സ്റ്റൈലായി ഡ്രസ് ചെയ്ത ഒരു ചെറുക്കനേയും ചെറുക്കത്തിയെയും ഞങ്ങള്‍ ഇരുത്തിയിരിക്കും. ആ റിസപ്ഷനില്‍ നിന്നാണ് സ്ഥാപനത്തിന്‍റെ യഥാര്‍ത്ഥ ബിസിനസ് ആരംഭിക്കുക.പ്രധാനികള്‍ കയറി വരുമ്പോള്‍ ഹാളിന്‍റെ ഒരറ്റം മുതല്‍ മറ്റേ അറ്റം വരെ സ്റ്റാഫുകള്‍ ഗുഡ് മോണിംഗും മറ്റും പറഞ്ഞു കൊണ്ടേയിരിക്കും.



A സെക്ഷന്‍ B സെക്ഷന്‍ എന്നിങ്ങനെ വിവിധ ഡിവിഷനുകള്‍ ഓഫീസില്‍ ഉണ്ടായിരിക്കും. അറിയാവുന്നവര്‍ക്ക് അറിയാം . A എന്നാല്‍ ആനിഹൈലേഷന്‍ (ANNIHILATION) സെക്ഷന്‍, B എന്നാല്‍ ബര്‍ഗ്ലറി (BURGLARY) സെക്ഷന്‍ സെക്ഷന്‍ എന്നിങ്ങനെയാണ്. ഉദാഹരണത്തിന് നിങ്ങള്‍ക്ക് ഒരാളെ കൊല്ലാനുണ്ട്‌ എന്ന് കരുതുക. നിങ്ങളെ റിസപ്ഷനില്‍ നിന്ന് എ സെക്ഷനിലെയ്ക്ക് ഡയറക്റ്റ്‌ ചെയ്യുന്നതായിരിക്കും. നിങ്ങള്‍ ഒരാളെ കൊല്ലാന്‍ ഏര്‍പ്പാടാക്കാന്‍ വന്നതാണ് എന്ന ഒരു ഇന്‍ഫീരിയോരിറ്റി കൊപ്ലക്സോ പാപബോധമോ വേണ്ടാത്ത വിധം തികച്ചും ഒരു കോര്‍പറേറ്റ് ഓഫീസ് ഡീല് ചെയ്യുന്ന വിധം പ്രൊഫഷനല്‍ ആയിട്ടായിരിക്കും നിങ്ങള്‍ കൈകാര്യം ചെയ്യപ്പെടുക. എ സെക്ഷന്‍ എന്നാല്‍ സെന്‍ട്രലൈസ്ഡ് ഏസിയില്‍ പ്രവര്‍ത്തിക്കുന്ന വിശാലമായ ഒരു മൂന്ന് നില സമുച്ചയം തന്നെയാണ്. ആളെ എങ്ങനെ ശാസ്ത്രീയമായി തീര്‍ത്ത്‌ കളയാം എന്നതിന്‍റെ സര്‍വ്വ റിസേര്‍ച്ചും അവിടെ നടക്കുന്നുണ്ട്. ഞങ്ങളുടെ സ്റ്റാഫ് ആളുടെ ഡീറ്റെയില്‍സ് കളക്റ്റ് ചെയ്യുകയും എമെര്‍ജന്‍സി അനുസരിച്ച് ചാര്‍ജ് കൂടും . അഡ്വാന്‍സ് പേ ചെയ്ത് രസീപ്റ്റ് വാങ്ങി മടങ്ങാം. ആള് തീര്‍ന്നു കഴിയുമ്പോ മൊബൈലില്‍ മെസേജ് വരും. പിന്നെ , നിങ്ങള്‍ ഓഫീസുമായി ബന്ധപ്പെടെണ്ടതില്ല.

ബര്‍ഗ്ലറി വിഭാഗം അന്താരാഷ്ട്ര നിലവാരമുള്ള ഹെയ്സ്റ്റ് (മോഷണം എന്നും പറയും) പ്ലാന്‍ ചെയ്ത് നടപ്പിലാക്കുന്ന വിഭാഗമാണ്‌. സമര്‍ത്ഥമായ ഒരു വര്‍ക്ക്ഷോപ്പും ലൈബ്രറിയും ഇവിടെയുണ്ട്. വര്‍ക്ക്ഷോപ്പില്‍ ഏറ്റവും ആധുനികമായ എക്വിപ്മെന്‍സ് നിര്‍മ്മിച്ചു കൊണ്ടിരിക്കുന്നു ആവശ്യാനുസരണം. തുരങ്കമുണ്ടാക്കാനുള്ള ഹാന്‍ഡിയായ മാന്തുപകാരണം മുതല്‍ പേനയില്‍ ഒളിപ്പിക്കാവുന്ന ലേസര്‍ കട്ടര്‍ വരെ അവിടെയുണ്ട്. INTELLECTUAL CONTRIBUTION നടത്തുന്നവരും MANUAL CONTRIBUTION നടത്തുന്നവരും ബര്‍ഗ്ലറി വിഭാഗത്തിലുണ്ട്. ലൈബ്രറിയില്‍ മികച്ച മോഷണ പുസ്തകങ്ങളുടെയും സിനിമകളുടെയും ശേഖരമുണ്ട്. ആല്‍ഫ്രഡ് ഹിച്ച്കൊക്കിന്‍റെ കൊലപാതക സിനിമകള്‍ ആഴ്ചയില്‍ ഒരിക്കല്‍ സ്ക്രീന്‍ ചെയ്യപ്പെടും.  കിഡ്നാപ്പിംഗ് സെക്ഷന്‍ വളരെ നല്ല സാധ്യതയുള്ള ഒരു മേഖലയാണ്. ഒരു വിഭാഗം കിഡ്നാപ്പിംഗ് കൈകാര്യം ചെയ്യും. 

ഡിസ്പോസിംഗ് സെക്ഷന്‍ ആണ് ഞങ്ങളുടെ സ്ഥാപനത്തിന്‍റെ ഹൈലൈറ്റ്. അത് ബില്‍ഡിംഗിന്‍റെ അണ്ടര്‍ഗ്രൌണ്ടില്‍ ഏറ്റവും മധ്യഭാഗത്തായി സ്ഥിതി ചെയ്യുന്നു. ഞങ്ങള്‍ തീര്‍ത്ത് കളയുന്ന ആളുകളുടെ കടാവറുകള്‍ (ശേഷിപ്പുകള്‍ ) ഡിസ്പോസ് ചെയ്യുന്ന ഇടമാണ് അത്. സ്ഥാപനം വിജയകരമായി നിലനില്‍ക്കുന്നതിന്‍റെ പ്രധാന ക്രെഡിറ്റ് ഡിസ്പോസിംഗ് സെക്ഷനാണ്. കാരണം സിനിമയിലെ മണ്ടന്‍ അധോലോക സംഘങ്ങളെപ്പോലെ ഞങ്ങള്‍ ഡെഡ് ബോഡികള്‍ കായലിലോ കടലിലോ ഒക്കെ താഴ്ത്തി പൊല്യൂഷന്‍ ഉണ്ടാക്കുകയോ, പോലീസ് സ്റ്റേഷനില്‍ കൊണ്ട് പോയി കുഴിച്ചിടുകയോ ഒന്നും ചെയ്യുന്നില്ല. മറിച്ച് ഓഫീസിന്‍റെ അണ്ടര്‍ ഗ്രൌണ്ടില്‍ ഞങ്ങള്‍ ഒരു ഇലക്ട്രിക് ക്രിമറ്റൊറിയം സ്ഥാപിച്ചിട്ടുണ്ട്. തീര്‍ത്ത് കഴിഞ്ഞ ഡെഡ്ബോഡികള്‍ ഞങ്ങള്‍ നല്ല ഫൈന്‍ പൌഡര്‍ ആക്കി മാറ്റി നല്ല പാത്രങ്ങളില്‍ ഡോക്യുമെന്‍റ് ചെയ്ത് സൂക്ഷിക്കുന്നു. ലോകത്ത് ക്രിമറ്റൊറിയം സ്വന്തമായുള്ള ഏക അധോലോക സംഘം ഞങ്ങള്‍ മാത്രമായിരിക്കും.




ഞങ്ങളുടെ സ്റ്റാഫാണ് സ്ഥാപനത്തിന്‍റെ ജീവന്‍. ഒരു കാലത്തും അവര്‍ സ്ഥാപനത്തില്‍ നിന്ന് പിണങ്ങിപ്പോകാത്ത വിധത്തിലുള്ള സാലറിയാണ്‌ ഞങ്ങള്‍ കൊടുക്കുക. സ്ഥാപനം അങ്ങനെ നില നില്‍ക്കേണ്ടത് അവരുടെയും ആവശ്യമാണ്‌. സ്റ്റാഫിന് പ്രത്യേകം ക്വാര്‍ട്ടെഴ്സ്, കുട്ടികള്‍ക്ക് പഠിക്കാന്‍ സ്കൂള്‍, പിന്നെ വര്‍ഷത്തില്‍ ഞങ്ങള്‍ ടൂറിനു പോക്കും മറ്റുമോക്കെയുണ്ട്. നിയമവശങ്ങള്‍ കൈകാര്യം ചെയ്യാന്‍ ലീഗല്‍ അഡ്വൈസര്‍മാരുടെ ഒരു പാനല്‍ തന്നെയുണ്ട്. അഥവാ, ആര്‍ക്കങ്കിലും ഒറ്റണം എന്ന് ആര്‍ക്കെങ്കിലും തോന്നിയാല്‍ അവരെ ഞങ്ങള്‍ അണ്ടര്‍ഗ്രൌണ്ട് സന്ദര്‍ശിക്കാന്‍ പറഞ്ഞു വിടും.




അധോലോകസംഘങ്ങളെക്കുറിച്ചുള്ള ഒരു ക്ലീഷേകളും ഞങ്ങള്‍ ആവര്‍ത്തിക്കാറില്ല. ഹാ ഹാ ഹാ എന്ന പൊട്ടിച്ചിരി, തുണിയില്ലാത്ത യുവതികളെ കൊണ്ടുള്ള നൃത്തം, അശരീരി പോലെയുള്ള സന്ദേശങ്ങള്‍, മൊട്ടത്തല , പൂച്ചയെ തടവല്‍, സ്രാവിന് കൊടുക്കല്‍, മുതലയ്ക്ക് കൊടുക്കല്‍, തുടങ്ങിയവ ഒന്നും ഞങ്ങള്‍ പിന്‍ തുടരുന്നില്ല. പിന്നെ , ഒന്നുണ്ട് . മരുന്ന് കച്ചവടം ഞങ്ങള്‍ ചെയ്യാറില്ല (ഡ്രഗ്സ് ) ഞങ്ങളുടെ മഹാഗുരു വിറ്റോ കോര്‍ലിയോണ്‍ അത് പാടില്ല എന്ന് അരുള്‍ ചെയ്തിട്ടുണ്ട്. സ്റ്റാഫ് പെരുമാറ്റം കൊണ്ടും വസ്ത്രധാരണം കൊണ്ടും തികച്ചും മാന്യമായിട്ടെ കസ്റ്റമേഴ്സിനോട്‌ ഇടപെടാവൂ എന്ന് നിഷ്കര്‍ഷിച്ചിട്ടുണ്ട്. കൂളിംഗ് ഗ്ലാസും കലിപ്പുള്ള മുഖവും എപ്പോഴും അവര്‍ നിലനിര്‍ത്തും. എവിടെയാണെങ്കിലും മുഖത്ത് ഭാവമില്ലാതെ തെക്ക് വടക്ക് നോക്കി നില്‍ക്കുന്നതാണ് ഇപ്പോഴത്തെ ഞങ്ങളുടെ രീതി. പിന്നെ , സിനിമകളില്‍ അധോലോക സംഘങ്ങളുടെ തലയില്‍ കെട്ടി വയ്ക്കാറുള്ള ഒരു തരം താണ പ്രവര്‍ത്തിയും ഞങ്ങള്‍ക്ക് ഇല്ല. സ്ഥാപനം പോളിറ്റിക്കലി കറക്റ്റ് ആക്കി നിര്‍ത്താന്‍ ഞങ്ങള്‍ ശ്രമിക്കുന്നതായിരിക്കും. സത്യത്തില്‍ സേവനമായിട്ടേ ഞങ്ങള്‍ ഈ പ്രൊഫഷനെ കണ്ടിട്ടുള്ളൂ.

കസ്റ്റമേഴ്സിനെ FEEL AT HOME ആക്കുക എന്നത് ഇപ്പോള്‍ ഞങ്ങളുടെ ഒരു നയം തന്നെയാണ്. പഴയ ജഗ്ഗുവിനെ പോലെയല്ല ഞങ്ങള്‍ മോഡേന്‍ ഗാംഗ്സ്റ്റേഴ്സ്. പണ്ടത്തെ തലയോട്ടിയുടെ പടമുള്ള ടീഷര്‍ട്ടൊന്നും ഞങ്ങളുടെ കമ്പനിയില്‍ ആരും ധരിക്കാറില്ല. മറിച്ച് , കറുത്ത സ്യൂട്ട് ധരിച്ച , മുടി ബ്രില്‍ ക്രീം തേച്ച് ചീകി വച്ച കൈയ്യില്‍ ഓട്ടോമാറ്റിക് ഗണ്ണ്‍ പിടിച്ച ചുള്ളന്‍മാരാണ് ഞങ്ങടെ ഓഫീസില്‍. കൂളിംഗ് ഗ്ലാസ് ഞങ്ങളുടെ ഡ്രസ് കോഡിന്‍റെ ഭാഗം തന്നെയാണ്. ഈയിടെയായി ഞങ്ങള്‍ സ്ലോ മോഷനില്‍ നടക്കാന്‍ കൂടി പ്രാക്ടീസ് കൊടുക്കുന്നുണ്ട്. ഇങ്ങനെയുള്ള സോഫിസ്റ്റിക്കെഷന്‍ ഒക്കെയാണ് എങ്കിലും ഞങ്ങള്‍ കൊടും ക്രൂരന്‍മാരായിരിക്കും. അത് ഭാവിക്കാറില്ലെങ്കിലും. ചാകാന്‍ പോകുന്നവന്‍ പോലും ഒരു നിമിഷം ചോദിച്ച് പോകും "എന്നെക്കൂടി നിങ്ങടെ കളിയില്‍ ..സോറി നിങ്ങടെ കമ്പനിയില്‍ കൂട്ടുമോ ? ഇതൊന്നും ഞങ്ങള്‍ ആരോടും പറയാറില്ല. എങ്കിലും സംശയം ഉന്നയിച്ചത് കൊണ്ട് പറയാം. ഷൂട്ട്‌ ഔട്ട്‌ നടത്താന്‍ വേണ്ടി ഒരു വലിയ ഷോപ്പിംഗ് മാള്‍ തന്നെ ഞങ്ങള്‍ പണി കഴിപ്പിച്ചിട്ടുണ്ട്. ധാരാവി ഒഴിപ്പിക്കുന്നത് പോലെയുള്ള കണ്‍ട്രിപ്പണികള്‍ ഞങ്ങള്‍ക്കില്ല. ശത്രുക്കളെ ഓടിച്ച് ഷോപ്പിംഗ് മാളില്‍ കയറ്റി തൂണിന് മറഞ്ഞു നിന്ന് അരമണിക്കൂര്‍ എങ്കിലും വെടികള്‍ വച്ചിട്ടേ ഞങ്ങള്‍ കൊല്ലൂ. അതിനു മുന്‍പ് എല്ലാ ശത്രുക്കള്‍ക്കും ഓരോ തോക്ക് ഫ്രീ കൊടുക്കും. വെടി വയ്ക്കുന്നവര്‍ക്ക് സ്വയം കണ്ട് ആനന്ദിക്കാന്‍ മാളില്‍ മൊത്തം കണ്ണാടികള്‍ വച്ചിട്ടുണ്ട്. ഒടുവില്‍ ചാകുന്നവരെ ജെ സീ ബിയില്‍ വാരി ക്രിമറ്റോറിയത്തിലേയ്ക്ക് കൊണ്ട് പോകും. ഇങ്ങനെ വളരെ പ്രമാദമായ ഒരു സങ്കല്‍പം.

അവസാനമായി അധോലോകത്ത് ജോലി ചെയ്യാന്‍ ആഗ്രഹിക്കുന്നവര്‍ക്ക് വേണ്ടി ഒരു പ്രൊഫഷനല്‍ കോഴ്സ് ആരംഭിക്കുക, അവര്‍ക്ക് വേണ്ടി സര്‍ട്ടിഫിക്കറ്റ് കോഴ്സുകള്‍ നടത്തുക, ഞങ്ങളുടെ സ്ഥാപനത്തില്‍ അവര്‍ക്ക്  Internship  ചെയ്യാന്‍ അവസരമോരുക്കുക തുടങ്ങിയ പദ്ധതികളും ആലോചനയിലുണ്ട്. മെഡിക്കല്‍ എന്‍ജിനീയറിംഗ് അധോലോകം ഞങ്ങളുടെ സഹോദര-സ്ഥാപനമാണ്‌. എങ്കിലും അങ്ങോട്ടുള്ള വിദ്യാര്‍ഥികളുടെ കുത്തൊഴുക്ക് ഒട്ടും സര്‍ഗാത്മകമല്ല എന്ന് ഞാന്‍ നിരീക്ഷിക്കുകയാണ്.